بعد نهاية مباراة الوداد البيضاوي والاتحاد السوري التي دامت 100 دقيقة، عبر لاعبو الفريق السوري ووراءهم جماهير حزب البعث عن فرحة هستيرية رغم أن هذا غير ماتش ديال لالي باقي الروتور، وربحو غير بواحد لزيرو.

المثير هو أن تصريحات بعض لاعبي الاتحاد لميكروفون قناة إي ار تي في أعقاب المباراة كانت صادمة ومثيرة للاستياء...

قال شي واحد من اللعابة ديال اتحاد حلب : " نهدي هذا النصر للشعب السوري ولشعب غزة"..

أواه، اللي سمعو يقول هدو طيحو طيارة اف 16 اسرائية في كدية الجولان...

الكل جاه الحماس على حماس وتذكر أطفال غزة ملي ربحو ولاد كزا..عفوا كازا.

والسوريين شحال هدي وغزة محاصرة وما لقاو مايهديو ليهم...لا دوا لا ماكلة لا مانطات لا بكية ديال التيد...

تسناو حتى جات الوداد وربحو عاد لقاو ما يهديو...

بحال لا الوداد فرقة من تل أبيب..

باغين تهديو تهديو شي حاجة لشي شعب هديك الساعة هديوه أمساخط الوالدين للجولان اللي اسرائيل مشبحة فيها قرن وزمارة.

دابا حنا ما غاديش نتسناو اعتذار ديال سوريا...عارفينها من دول الممانعة أي:

لا صلح، لا اعتذار لا مولاي بيه.

أحسن رد من الوداد هوما يملخو هاد الفرقة هنا في كازا، وهديك الساعة يهديو الخسران لشي حد أخر في رام الله ما شي غير في غزة.